ಯಶಸ್ಸಿನ ಶಿಖರವೇರುವಾಗ ನಾವು ದಾಟಲೇಬೇಕಾದ ಎರಡು ಮೆಟ್ಟಿಲುಗಳು

ಗೆಳೆಯರೆ,

ಯಶಸ್ಸಿನ ಶಿಖರವನ್ನೇರುವ  ದಾರಿ ಪ್ರತಿಯೊಬ್ಬರಿಗೂ ಒಂದೇ, ಆ ದಾರಿಯಲ್ಲಿ ನಾವೆಲ್ಲರೂ ಕೆಲವು ಮೆಟ್ಟಿಲುಗಳನ್ನು ಖಂಡಿತವಾಗಿ ದಾಟಲೇಬೇಕು.

ಪ್ರತಿಯೊಬ್ಬ ಸಾಧಕನು ಹತ್ತಲೇಬೇಕಾದ ಮತ್ತು ದಾಟಲೇಬೇಕಾದ ಎರಡು ಮೆಟ್ಟಿಲುಗಳು ಯಾವುವು ಗೊತ್ತಾ…

ಅಧೈರ್ಯ ಪಡಿಸುವ, ನಮ್ಮಿಂದ ಸಾಧ್ಯವೇ..? ಎಂದು ಸಂದೇಹ ಮೂಡಿಸುವ, ನಿನ್ನಿಂದ ಸಾಧ್ಯವಿಲ್ಲ ಹಾಸಿಗೆ ಇದ್ದಷ್ಟು ಕಾಲುಚಾಚು ಎಂದು ʼಮಿತಿ ಎಂಬ ಮಿಥ್ಯೆಯನ್ನು ನಮ್ಮ ಮುಂದೆ ಅಡ್ಡಗೋಡೆ ಕಟ್ಟುವ ಜನರು, ನಮ್ಮ ಸುತ್ತಲು ಒಂದು ಮೆಟ್ಟಿಲು ಆವರಿಸುತ್ತದೆ, ನಾವು ಆ ಮೆಟ್ಟಿಲನ್ನು ದಾಟಲೇಬೇಕು.

ನಮ್ಮ ಮೇಲೆ ನಾವು ನಂಬಿಕೆಯಿಟ್ಟು ನಮ್ಮ ಗುರಿಯೆಡೆಗೆ ವಿಶ್ವಾಸದಿಂದ ಸಾಗಬೇಕು ಹಾಗೆ ಸಾಗಿ, ಆ ಮೆಟ್ಟಿಲು ದಾಟಿದ ನಂತರ ನಮಗೆ ಮತ್ತೊಂದು ಮೆಟ್ಟಿಲು ಸಿಗಬಹುದು ಅದು ಸೋಲೆಂಬ ಮೆಟ್ಟಿಲು, ಆ ಮೆಟ್ಟಿಲನ್ನು ನಾವು ದಾಟಲೇಬೇಕು.

ಅಧೈರ್ಯ ಪಡಿಸಿದ ಜನರ ದಾಟಿ ಬಂದ ನೀವು , ಸೋಲಿನ ಪಟ್ಟಿಯಲ್ಲಿ ನಿಂತು ಕೈಚೆಲ್ಲಬಾರದು. ಸೋಲಿನ ಮೆಟ್ಟಲಿನಲ್ಲಿ ಕೂಡ ನಿಮ್ಮ ಆತ್ಮವಿಶ್ವಾಸ, ನಂಬಿಕೆ ಮತ್ತು ನಿಮ್ಮ ಗಮ್ಯದ ಕಡೆಗಿರುವ ನಿಮ್ಮ ಶ್ರದ್ಧೆ ಕಿಂಚಿತ್ತೂ ಕಡಿಮೆಯಾಗಬಾರದು, ಬದಲಿಗೆ ಸೋಲು ಕಲಿಸಿದ ಪಾಠವು ನಿಮ್ಮ ಶಕ್ತಿಯಾಗಬೇಕು.ನಿನ್ನಿಂದಾಗದು ಬಿಟ್ಟುಬಿಡು ಎಂದು ನಿಮ್ಮನ್ನು ನಿರುತ್ಸಾಹಗೊಳಿಸಿದವರ ನಡೆ ನಿಮ್ಮಲ್ಲಿ ಹಠವನ್ನುಂಟು ಮಾಡಬೇಕು.

ಏಕೆಂದರೆ,

'ಡೇಲ್‌ ಕಾರ್ನೆಗಿʼ ಎಂಬ ಅಮೇರಿಕಾದ ಪ್ರಸಿದ್ಧ ಲೇಖಕ, ಉಪನ್ಯಾಸಕ ಮತ್ತು personality development ಕೋರ್ಸುಗಳ ರಚನೆಗಾರ  ಈ ಎರಡು ಮೆಟ್ಟಿಲುಗಳ ಬಗೆಗೆ ಹೀಗೆಂದಿದ್ಧಾರೆ –“Discouragement and failure are two of the surest stepping stones to success’ ಅಂದರೆ ಧೈರ್ಯಗೆಡಿಸಿ ನಿಮ್ಮನ್ನು ನಿರುತ್ಸಾಹಗೊಳಿಸುವ ಜನರು ಮತ್ತು ನಿಮ್ಮ ಸೋಲು ಎರಡೂ ಕೂಡ ನಿಮ್ಮ ಯಶಸ್ಸಿನೆಡೆಗೆ  ಭದ್ರ ಮೆಟ್ಟಿಲುಗಳಾಗುತ್ತವೆ ಎಂದಿದ್ದಾರೆ.

         ನಿಜ, ನೀವು ಯಶಸ್ಸಿನತ್ತ ಮುಖ ಮಾಡಿದ ಕೂಡಲೇ, ನಿಮಗೆ  ಸಿಗುವುದು ನಿಮ್ಮನ್ನು ನಿರುತ್ಸಾಹಗೊಳಿಸುವ ಮಾತುಗಳು, ಮುನ್ನೆಚ್ಚರಿಕೆಯಂತೆ ಸಿಗುವ ಹಿಂಜರಿಕೆಯ ನುಡಿಗಳು, ನೀವು IAS ಮಾಡುತ್ತೇನೆ ಎನ್ನಿ, ಗೆಳೆಯರಲ್ಲಿ ಅದಕ್ಕೆ ತುಂಬಾ ಓದಬೇಕು ಅನ್ನೋ ಅಪಸ್ವರ, ಸಮಾಜದಲ್ಲಿ IAS ಮಾಡಿ ಏನ್ಮಾಡ್ತಿಯಾ ಮಂತ್ರಿ-ಕಂತ್ರಿಗಳ ಕಾಲ್ಬುಡದಲ್ಲಿ ಕೈ ಕಟ್ಟಿ ನಿಂತ್ಕೊ ಬೇಕಾಗುತ್ತೆ ಅನ್ನೋ ಅಸಹನೆ, ಮನೆಯಲ್ಲಿ- ಅದಕ್ಕೆ ಅಷ್ಟೊಂದು ಹಣ ಎಲ್ಲಿಂದ ತರುವುದು ಅನ್ನೋ ಅಸಹಾಯಕತೆ.

ನೀವು FDA/SDA ಪರೀಕ್ಷೆ ಬರೆದು ಸರ್ಕಾರಿ ಕೆಲಸಕ್ಕೆ ಸೇರ್ತೀನಿ ಅಂದು ನೋಡಿ, ಗೆಳೆಯರು ಪ್ರಶ್ನೆಪತ್ರಿಕೆ ಸಿಗುತ್ತೆ ನೋಡೋಣ ಅಂತಾರೆ, ಕೆಲವರು ಎಷ್ಟೊಂದು ಜನ ಪರೀಕ್ಷೆ ಬರಿತಾರೆ ಅಂದು ನಿರಾಸಕ್ತಿ ಮೂಡಿಸುತ್ತಾರೆ, ಮತ್ತು ಲಂಚಕೊಟ್ಟರಷ್ಟೆ ಕೆಲಸ ಅನ್ನೋ ನಿರಾಶೆ,, ಮತ್ತೆ ಹಲವರು ಅದಕ್ಕೆಲ್ಲಾ ತುಂಬಾ ಓದಬೇಕು ಆಗಲ್ಲ ಕಷ್ಟ ಅಂದರೆ, ಮಗದಷ್ಟು ಜನ ಹಳೆಯ ಒಂದಷ್ಟು ಪ್ರಶ್ನೆಪತ್ರಿಕೆ ಸಾಲ್ವ್‌ ಮಾಡಿಬಿಟ್ರೆ ಸಾಕು ಮತ್ತು ಮಹನೀಯರು YouTube video ನೋಡಿದ್ರೆ ಸಾಕು , ಪರೀಕ್ಷೆ ಪಾಸಾಗಿ ಕೆಲಸ ಸಿಕ್ಕಿದ ಹಾಗೇನೆ…. ಹೀಗೆ  ಪರೋಕ್ಷವಾಗಿ – ಪ್ರತ್ಯಕ್ಷವಾಗಿ ನಿಮ್ಮ ಯಸಸ್ಸಿನೆಡೆಗಿನ ನಿಮ್ಮ ಗಮನವನ್ನು ನಿರ್ನಾಮ ಮಾಡಿಬಿಡುತ್ತಾರೆ. 

     ಇವರು ತುಂಬುವ ಈ ಹಿಂಜರಿಕೆಯನ್ನು, ಹುಟ್ಟಿಸುವ Shortcut ಗಳನ್ನು ವ್ಯವಸ್ಥೆಯ ಲೋಪಗಳಲ್ಲಿ ಇಣುಕುವ ಅಪನಂಬಿಕೆಗಳನ್ನು ಮೀರಿ ಈ ಮೆಟ್ಟಿಲನ್ನು ನೀವು ದಾಟಲೇಬೇಕು.

ಅದು  IAS ಇರಲಿ , FDA/SDA/Banking ಹೀಗೆ ಯಾವುದೇ ಇರಲಿ, ಇಲ್ಲಿ ನಿಮ್ಮ ಸಾಧನೆಯ  ಹಾದಿ ಕ್ರೀಡೆಯಲ್ಲಿರಲಿ-ಕೃಷಿಯಲ್ಲಿರಲಿ, ಯಾವುದೇ ಕ್ಷೇತ್ರದಲ್ಲಿರಲಿ, ನೀವು ಸಾಧನೆಯ – ಯಶಸ್ಸಿನ ಹಾದಿ ಹಿಡಿದಾಗ ನಿಮಗೆ ಸಿಗುವ ಮೊದಲ  ಮೆಟ್ಟಿಲು – ಹಿಂಜರಿಕೆ ಮೂಡಿಸಿ, ನಿಮ್ಮ ಸಾಧನೆಯ ಕನಸನ್ನು ಮೂದಲಿಸುವ, ನಿಮ್ಮ ಶಕ್ತಿಯ ಮೇಲೆ ನಿಮಗೆ ಅಪನಂಬಿಕೆ ಮೂಡಿಸುವ , ನಮ್ಮ ಸಮಾಜದ ಅಂಕು-ಡೊಂಕುಗಳ ಕುರಿತು ನಮ್ಮಲ್ಲಿ ಅಸಹಾಯಕತೆ ಮೂಡಿಸುವ ಜನರೇ ತುಂಬಿರುವವರದು  ನೀವು ಇದನ್ನು  ದಾಟಲೇಬೇಕು.

ಇದನ್ನು ದಾಟಬೇಕೆಂದರೆ ನೀವು ಒಂದು ಮುಖ್ಯವಾದ ಅಂಶವನ್ನು ಗಮನದಲ್ಲಿಟ್ಟುಕೊಳ್ಳಬೇಕು – ಅದೇನೆಂದರೆ, ಪ್ರಪಂಚದಲ್ಲಿ ಈವರೆಗೂ ಸಾಧನೆ ಮಾಡಿ ಯಶಸ್ಸಿನ ಉತ್ತುಂಗವೇರಿದವರಲ್ಲಿ ಶೇ. 99 ರಷ್ಟು ಜನ ನಮ್ಮ-ನಿಮ್ಮಂತಹ ಜನಸಾಮಾನ್ಯರೆ, ಸೌಲಭ್ಯಗಳ ಕೊರತೆಯಿದ್ದವರೆ, ಸಂಪನ್ಮೂಲಗಳ ಅಭಾವವಿದ್ದವರೆ. 

       ಒಮ್ಮೆ ಅವಲೋಕಿಸಿ ನೋಡಿ , ನಮ್ಮೊಂದಿಗಿರುವ ಇನ್ಫೋಸಿಸ್‌ ನಾರಾಯಣ ಮೂರ್ತಿ, ಪ್ರಪಂಚದ ಶ್ರೀಮಂತರ ಸಾಲಿನಲ್ಲಿ  ಮೊಟ್ಟಮೊದಲಿಗೆ ನಿಂತ ಬಿಲ್‌ಗೇಟ್ಸ್‌, ಪ್ರಸಿದ್ಧ Facebook ಸಂಸ್ಥಾಪಕ.. ಹಾಗೆ ಯಾವುದೇ ಕ್ಷೇತ್ರದ ಸಾಧಕನ ಬಗೆಗೆ ಅರಿತುನೋಡಿ, ಇಂದು ಇಡೀ ಜಗತ್ತನ್ನೇ ಮರಳು ಮಾಡಿರುವ Apple ಮೊಬೈಲ್‌ಗಳ ಸಂಸ್ಥೆಯ ಸಂಸ್ಥಾಪಕ ಸ್ಟೀವ್‌ ಜಾಬ್‌ನ ಬಾಲ್ಯವನ್ನೊಮ್ಮೆ ಕೆದಕಿ ನೋಡಿ, ಅವನ ಸಾಧನೆಯ ಸಂಘರ್ಷಗಳನ್ನು ಸವಿದು ನೋಡಿ,… They all grown up from ground root.

ಬಡವರಾಗಿ, ಮಧ್ಯಮವರ್ಗದವರಾಗಿ, ಅಲ್ಪ ಸವಲತ್ತುಗಳನ್ನು ಹೊಂದಿದವರಾಗಿ, ವಿರಳ ಸಂಪನ್ಮೂಲಗಳನ್ನು ಹೊಂದಿದವರಿಂದಲೇ ಸಾಧಿಸುವ ಯೋಗ್ಯತೆ ಇದೆ. Yes, ಅದೇ ನಮ್ಮ ಯೋಗ್ಯತೆ , ನಮ್ಮ ಗಮ್ಯ, ಛಲ, ಆತ್ಮಬಲಗಳೇ  ನಮ್ಮ ಯೋಗ್ಯತೆ. ದಾಟಿ ಬನ್ನಿ ಆ ಮೆಟ್ಟಿಲನ್ನು. 

       ಸೋಲಿಗೆ ಅಂಜುವ ಅಗತ್ಯವಿಲ್ಲ, ಸೋಲೆನ್ನುವುದು ಸಾಧನೆಯ ಶಿಖರವನ್ನೇರಲು ನಮಗೆ ನೀಡುವ ಅನುಭವ-ಅವಲೋಖನಗಳ ಪಾಠವಷ್ಟೆ. ಆ ಪಾಠ ಅಭೂತಪೂರ್ವ ಅನುಭವದೊಂದಿಗೆ ಯಶಸ್ಸಿನ ಶಿಖರವನ್ನೇರುವ ಅವಕಾಶವನ್ನು ನೀಡುತ್ತದೆ. ಸೋಲು ನಮ್ಮ ಸಾಧನೆಯನ್ನು  ಮತ್ತಷ್ಟು ಪರಿಪಕ್ವಗೊಳಿಸುತ್ತದೆ.

ಹಾಗಾದರೆ, ಸೋಲನ್ನು ಹೇಗೆ ನೋಡಬೇಕು, ಸೋಲಿನಿಂದ ಏನೂ ಕಲಿಯಬೇಕು, ಸೋಲಿನ ಸವಿಯನ್ನು ಹೇಗೆ ಸದುಪಯೋಗಪಡಿಸಿಕೊಳ್ಳಬೇಕು….?

ʼಸೋಲುʼ ಎನ್ನುವುದು ನಮ್ಮ ಮತ್ತೊಂದು ಅವಕಾಶದ ಜೊತೆಗೆ ಮತ್ತಷ್ಟು ಅನುಭವವನ್ನು ನೀಡುತ್ತದೆ.

ಸೋತಿದ್ದೇಕೆ? ಮತ್ತು ಸೋತಿದ್ದೇಲ್ಲಿ…? ಎಂಬ ಕಾರಣಗಳನ್ನು ಅವಲೋಕಿಸಿದಾಗ ನಮಗೆ ಗೆಲುವಿಗೆ ಅನೇಕ ಆಯಾಮಗಳು ಮತ್ತು ದಾರಿಗಳು ದೊರೆಯುತ್ತವೆ. ಹಾಗೆ ನಾವು ಸೋಲನ್ನು ಸೋಪಾನ ಮಾಡಿಕೊಳ್ಳಬೇಕು, ಹಾಗೆ ಅದನ್ನು ಮೆಟ್ಟಿಲು ಮಾಡಿಕೊಳ್ಳಬೇಕು.

ಸೋತೆನೆಂದು ಎದೆಗುಂದಬಾರದು, ಅವಮಾನ ಪಟ್ಟುಕೊಳ್ಳಬಾರದು, ಸೋಲಿನೊಂದಿಗೆ ಎಕ್ಸ್ಟ್ರಾ ಅನುಭವ ಪಡೆದನೆಂದು ಹಿಗ್ಗಬೇಕು, ಆದರೆ ಆ ಸೋಲಿನ ನಂತರದ ನಿಮ್ಮ ಪ್ರಯತ್ನವು ಸರ್ವ ಸಿದ್ಧವಾಗಿ, ಮಾಡಿದ  ತಪ್ಪುಗಳನ್ನು ಮನಗಂಡು ಅವಲೋಕಿಸಿ , ಸರಿಯಾದ ಗುರಿಯೆಡೆಗೆ ನೂರಕ್ಕೆ ನೂರು ಸರಿಯಾದ ಪ್ರಯತ್ನವಾಗಿರಬೇಕು ಮತ್ತೊಂದು ಸೋಲು ಎದುರಾದರೆ…?

   ಪ್ರಿಯ ಗೆಳೆಯರೆ, ಮೊಟ್ಟಮೊದಲಿಗೆ ಮೌಂಟ್‌ ಎವರೆಸ್ಟ್‌ ಪರ್ವತವೇರಿದವರಲ್ಲಿ ಒಬ್ಬರಾದ “ತೆನ್ಜಿಂಗ್‌ ನಾರ್ಗೆʼ ಕೂಡ ಆ ಪರ್ವತವನ್ನು ಏರಿ ಮೊಟ್ಟ ಮೊದಲಿಗ ಎನಿಸಿಕೊಳ್ಳುವ ಮೊದಲು ಆರು ಬಾರಿ ಸೋತಿದ್ದ, ಒಮ್ಮೆ ಪ್ರಪಾತಕ್ಕೆ ಕುಸಿದು ಜೀವನ – ಮರಣದ ರುಚಿ ನೋಡಿ ಬಂದಿದ್ದರು. ಆದರೆ ಆ ಸೋಲಿನ ಪ್ರಪಾತಗಳ್ಯಾವುವು ಅವನ ಯಶಸ್ಸಿನ ಶಿಖರದ ಆಸೆಯನ್ನು ಹಳ್ಳಕ್ಕೆ ನೂಕಲಿಲ್ಲ.

So,

“Shallow men believe in luck, strong men believe in cause and effects” ಎಂಬ ಮಾತೊಂದಿದೆ, ನೀವು ಸಾಧನೆಗೆ ಶಕ್ತರಾಗಿದ್ದರೆ ಸೋಲುಗಳು ಎಷ್ಟೇ ಬರಲಿ ಕಾರಣ ಹುಡುಕಿ, ಆ ಕಾರಣಗಳನ್ನು ಒಂದೊಂದಾಗಿ ಸದೆ ಬಡಿದು , ಸೋಲಿನ ಮೆಟ್ಟಿಲು ಏರಿ ಬನ್ನಿ.

ನೆನಪಿಡಿ…

ಯಶಸ್ಸು ಕೇವಲ ಬಯಸುವುದಲ್ಲ

                        ಬದುಕುವುದು

ಸಾಧನೆ ಕೇವಲ ಸಾರುವುದಲ್ಲ

                        ಶ್ರಮಿಸುವುದು

ಸೋಲು ಕೇವಲ ಹಿಂಬಡ್ತಿಯಲ್ಲ

                        ಹೆಗ್ಗಳಿಕೆ

ಸಾಧನೆಯೆಡೆಗೆ ಗುರಿ ನೆಟ್ಟವನು

ಕೇವಲ ಸಾಮಾನ್ಯನಲ್ಲ ಅವನು

ಸಾಮಾನ್ಯರಲ್ಲಿ - ಅಸಾಮಾನ್ಯ

                                                                                        ದೀಪು. ಕೆ. ಎಂ. ಗೌಡ